Елбасы Жаңа жыл мерекесімен құттықтады
Президентің құттықтауы
Қымбатты отандастар!
Келе жатқан Жаңа жыл баршамызға құт берекесімен келгей!
Бұл – ескі жылға ризалық, жаңа жылға тілек айтатын айрықша сәт!
Өтіп бара жатқан жыл бірлік пен берекенің, тұрақтылық пен татулықтың жылы болды.
Басты бағдарымыз – «Қазақстан-2050» стратегиясының алғашқы жылын табысты бастадық.
Бұл – біздің баршаны біріктіретін, ұлысты ұйыстыратын асқақ аңсарымыз.
Біз Тәуелсіздігіміздің тұғырлы, мемлекетіміздің ғұмырлы болуын қалаймыз.
Сол үшін алда келе жатқан жылдан үлкен үміт, жоралы жақсылық күтеміз.
Жаңа жыл Қазақстанның жаңа дәуірін жалғастырады деп кәміл сенемін.
Ардақты ағайын!
Жаңа жыл – әр үйге шаттық сыйлайтын отбасылық мереке.
Еліміздегі әр шаңырақ – құтты ордамыз Қазақстанның бөлінбес бөлшегі.
Алда қазанатын қадірлейтін халқымыз үшін қастерлі жылқы жылы келе жатыр.
Қазақ «Ат мұратқа жеткізеді» деп жылқыны ерекше бағалаған.
Жаңа жыл жақсылығын ала келсін!
Әулеттеріңіз әрдайым қуанышқа бөлене берсін!
2014 жыл елімізді әлемнің төріне шығаратын құтты жыл болсын!
Баршаңызға бақыт тілеймін!