АИТВ-инфекциясы бойынша сұхбат
Павлодар облыстық АИТВ-инфекциясының алдын алу жөніндегі орталығы басшысының орынбасары Б.Қ.Жанахметова АИТВ-инфекциясының алдын алу және емдеу мәселелері бойынша журналистерге сұхбат берді, сондай-ақ эпидемиологиялық жағдай туралы айтты.
- Павлодар облысы АИТВ жұқтырғандар саны бойынша елімізде 100 мың тұрғынға шаққанда үшінші орында тұр. Жыл сайын 200-250 жаңа жағдай анықталады, – деп баяндады басшы орынбасары. - Әрдайым көптеген сұрақтар туындайды. Біздің жұмысымыз негізінен жастарға, пробация қызметінің есебінде тұрған адамдарға бағытталған. АИТВ орталығының мамандары өңірдің аудандары бойынша шығатын жылжымалы есірткіге қарсы пункттің жұмысына қатысады. Консультациялардан басқа, біз барлығына жедел тестілеуді өткіземіз. Қазір барлығы әлеуметтік желілерде отырады және сол жерден көптеген ақпарат алады деп қалай айтсақ та, АИТВ-инфекциясы туралы әлі де көптеген аңыздар мен мифтер бар. Мысалы, инфекция сүйісу немесе қол алысу арқылы жұғады деген аңыз бар.
Маман атап өткендей, АИТВ-инфекциясын жұқтырғандардың жалпы санының 35-40% – есірткі қолданатын адамдар. Қалғандары жыныстық жолмен жұқтыруға бейім.